Hotuhotu ana a Ngāi Tuhoe, a Mataatua otirā te ao Māori mo te tōtara nui o te Wao tapu o Te Urewera kua hinga, arā, ko Te Makarini Temara.

I riro ake i te ringa makihuhunu o aitua i te ata pō nei. He tohunga ki ngā karakia o te ao Māori e kitea ana ki ngā maha kaupapa tuwhera, kaupapa hiki i te tapu, nga huihuinga Māori ara atu, ara atu.

He tohunga tito waiata mo āna kapa penei i a Ruatahuna Kakahu Mauku me ngā maha kapa i whaia e ia. He pouako he tohunga hoki ia i te Whare Wānanga o Awanuiarangi i roto i ngā mahi matauranga Maori, otirā he manu whakaniko ia i te Reo Maori.

E kore ra te puna o roimata e maroke i runga i to ngarohanga e te papa. Te Makarini hoki atu ra ki o maunga karangaranga kia uhia koe e Hinepukohurangi. Haere, haere whakangaro atu ra.