No reira te korero a Te Whetu McCorkindale o Te Komiti o Runga i Ruatoki kei te whai ratau i nga taitamariki ohu kia pakeke i te tau tekau ma rua piki ake kia hono ki te kahui rapunga koiwi mokotuauri – mokoweri ranei i o ratau ake whenua o Te Waimana, Waikaremoana me Ruatahuna.

Ka mahi tahi nga kairapu mokotuauri i era kaiputaiao o te kahui Te Pu Ao ara GNS. Kei te timata te rapunga koiwi mokotuauri a te rangi rua tekau o te marama o Pou-tu-te-rangi e taka mai nei ki roto tuatahi i te rohe o Ruatahuna kia rima nga rangi i nga wahi e rua e karikari ana haunga te ahuatanga o te huarangi hei aua wa.

Ki te tapanga a Te Whetu McCorkindale kei te huihui nga kahui rapunga koiwi mokotuauri ki te marae o Te Umuroa i Ruatahuna, kia mutu rano te pohiri i te tekau haora ata me te whai kai hoki katahi hei te ahiahi ka neke atu ki te awa o Ruatahuna ki reira whakatutu i nga teneti nohonga i taua wahi hei whakaruruhau i nga tangata o Onukurangi me era kaiputaiao o Te Pu Ao o Aotearoa e takatu ai te karikari koiwi mokotuauri a te rangi tuarua.