I te po rapare, ka whakawhiwhia te Tohu Maioha a APRA ki a Rob Ruha, he kaitito-kaiwaiata nō Te Tai Rāwhiti. Tēnei te rima tekau mā tahi tau o Ngā Tohu Silver Scrolls a APRA i Tāmaki Makaurau.

Pakō ana te ‘Kariri’ a Rob Ruha i te nguha a IHI (Thomas Rāwiri rāua ko Mokoia Huata) me tā rāua waiata ‘Mana Whenua’, i a Kirsten Te Rito me tana waiata ‘Tamaiti Ngaro’, he mea tito e James Illingworth rāua ko Joseph Te Rito.

E whai wāhi ana a Tiki Taane ki rō ‘Kariri’, he mea hahu ake i ngā kōrero a te iwi Māori me tōna whawhai mō te Mana Māori Motuhake – Tino Rangatiratanga ki ngā ope tauā o Ingarangi i ngā tau 1850. Tērā te tohungatanga o Rob Ruha ki te whakairo i te mana, te wairua o te kupu ki te paeoro tākirikiri whatumanawa hei tohu i te kakari, te pōuri, te mate, te riri, te mārohirohi me te tūmanako.

Tā te Tohu Maioha a APRA he whakanui i te kairangi o te waiata reo Māori, ā, ko te tuarua tēnei ka riro i a Rob Ruha, nāna hoki i toa i te tau 2014 mō tana waiata a ‘Tiki Tapu’.

Nō Wharekahika (Te Tai Rāwhiti) tēnei poho kererū o Ngāti Porou me Te Whānau-a-Apanui, kua rongonui, kua tino kauanuanu a Rob Ruha i te Ao Māori me te ao waiata o Aotearoa. He pūkenga ahurei, he kairaranga, he kaitito waiata, haka, mōteatea, he mātanga kapahaka, he tupua ki te kōrero anō hoki.

Ka rangona te waiata ‘Kariri’ a Rob Ruha i runga i tana kōpae roa tuatahi a PŪMAU, i whakaputaina i tēnei tau, ā, e tāpoi ana ia i Aotearoa ināianei tonu.

I whakawhiwhia tuatahitia te Tohu Maioha a APRA i te tau 2003, ā, mai i tērā wā, kua tau a Te Ngore – te pakoko o te tohu Maioha i whakairotia ai e Brian Flintoff – ki roto ki ngā ringa o ētahi o ngā kaitito waiata tino kauanuanu o Aotearoa; pērā i a Ngahiwi Apanui – te tangata i whakawhiwhia tuatahitia ai ki te tohu, ki a Whirimako Black, ki a Ruia Aperahama, ki a Te Awanui Reeder, ki a Maisey Rika, ki a Vince Harder, ki a Troy Kingi rātou ko Stan Walker.

I te tukuhanga o Te Ngore i tētahi kaitito ki tētahi, ka mahara tātou he mana tō te puoro hei whakakotahi, hei taunaki, hei whakaako, hei whakakori, hei whakaahuru, hei whakamārama, hei whakaawe anō hoki i a tātou.

Ka riro mā te toa o te Tohu Maioha a APRA a Te Ngore e tiaki mō ngā marama tekau mā tahi, ā, ka whakawhiwhia te $3,000.

I tū Ngā Tohu Silver Scrolls 2016 i te Whare Tapere o Vector, i Tāmaki Makaurau i te Rāpare 29 o Mahuru. Mō ētahi atu whakamahukitanga, me ngā toa katoa, tirohia www.apraamcos.co.nz

He mea tautoko tēnei kaupapa nā Panhead Custom Ales.